“Ku kyautata Allah yana son Masu kyautatawa” (Bakara: 195)
¨ “Wanda ba ya girmama manyanmu,kuma ba ya tausayin kananamu ba
shi daga cikinmu” (Sahihul Jami’a)
¨ Annabi (SAW) ya ce: “Ku rika musayen kyuta (a junanku) sai soyayyar
(dake tsakaninku) ta karu.(Sahihul Al’adabul Mufrad)
¨ Annabi (SAW) yana ziyartar ‘ya’yansa a gidajen mazansu. Kai ma ka rika yin haka nan, sai ka dace da sunna, kuma soyayyar dake tsakaninku ta kara habaka.

Aljanna tana karkashin dugadugan mahaifa (mata) (Ahmad da Nasa’i)

 • Don isar da sakon nasiha, ga mijinki,ko mahaifinki rika ajiye masa KASET din da ya kunshi wannan sakon A CIKIN MOTA kusa da wurin sa kaset (ba tare da kin gaya masa ba)

• Annabi (SAW) yakan taya matansa aikin gida.

• Me kake so ka zama a nan gaba?

 • Kyautatawa danka yana karami,sai ya kyutata maka in ya girma

Tsoron Allah shi ne tushen nasara a zamantakewar aure da tarbiyyah.
“Kar ku manta da mutuncin dake tsakaninku (Bakara:237 ) .
Namiji da bangaren HAGU na kwakwalwarsa yake tunani, mace kuma na DAMA. Ya za ki amfana da wanan bayanin a zamanki da mijinki?
Zama baiwar mijinki, sai ya zama bawanki
“Idan muslumi ya ciyar da iyalinsa don neman lada a wurin Allah, ta zama sadaka (Bukhari: 5351).
Gangancin yaro kuskure ne.
Wanda ya wahala yana yaro, in ya girma zai huta.

       Jami’a tana daya daga cikin wurare da suke ba wa mutum ‘yanci, ma’ana ba mai takura masa, kuma ba a damu da abin da yake yi ba. Amma kuma idan aka duba jami’a wuri ne mai hadarin gaske in dai har mutum bai yi mata da gaske ba. Jami’a mahada ce ta mutune daban-daban, daga wurare daban-daban wadanda tarbiyyarsu da al’adunsu suka bambanta; saboda haka ya kamata dalibai musamman sababbi su lura da wadanda za su zauna tare a matsayin abokai, kawaye ko makamancin haka; don akwai mutane da za su batar da mutum in har bai yi a hankali ba, ko kuma shi bai yi kokarin jawo su zuwa hanya ta daidai ba; domin wasu manufarsu ta shiga jami’a ba wai samun ilimin da suka je nema ba ne, a’a, su dai kawai su sami yadda za su yi su lalata tarbiyyar ‘yan uwansu matasa ne. A yanzu da yawa daga cikin dalibai suna jami’a, amma ba su da wata manufa mai nagarta ta kasancewarsu a cikinta, da za ka tambayi wani dalibin ka ce me zai karanta a jami’a, sai ya ce: Ai komai aka ba shi karantawa zai yi. Abin tambaya a nan shi ne: Shin wai yin jami’ar ne ya zama dole, ko kuwa manufa ce babu! Ya kamata mutane su san cewa yin jami’a ba wai zama dole ya yi ba, sai dai don manufar samun ilimi mai nagarta domin taimakon addini da al’ummar musulmi, musamman saboda kalubalen dake fuskantar musulmi ta fuskoki daban-daban a cikin gida da waje. In aka duba bangaren mata misali, na ha]u da wasu sa’o’ina da ba su sami kyakkyawar shawara akan abin da ya kamata su karanta ba, a cikin ire-iren wadannan dalibai sai ka ga mace ta je ta dauki kamar Civil Engineering; (abin da ya kunshi koyar da yadda ake yin tituna, gadoji, dss). Ko kuma irin su Political Science da makamantansu, ni kuma ina ganin cewa gudunmawar da mace za ta bayar ta irin wad annan kwasa-kwasai ba su dace da dabi’ar ‘ya mace ba. A halin da muke ciki a yau, al’ummarmu tana bukatar mata wa]anda suka kware a fannonin aikin asibiti kamar likitanci, nurse da unguwarzoma da makamantansu; saboda haka ne ma nake da burin karanta aikin likita, kuma nake fatan Allah ya cika min burina, ya taimakamin akan samun nasarar shiga da kwarewa a wannan fannin.

FATIMA HUSAIN FALAKI

Imamu Ahmad (Allah ya ji kansa) bai yi auren fari ba sai da ya kai shekara arba’in; da ya tashi aure sai ya fara tantance gidan da ya kamata ya hada zuriya da su, sai aka ce masa akwai ‘yan mata biyu a gidan, daya kyakkyawa ce, dayar kuma idonta daya, sai ya ce wacce ta fi hankali? sai aka ce mai ido dayan, sai ya ce: ita za ku aura min. Zamansu ya yi dadi sosai. Bai yi wani auren ba sai da ta rasu.

 Yake cewa: Almarwazi daya daga cikin daliban imamu Ahmad (Allah ya ji kansa) ya ce: wata rana imamu Ahmad ya ambaci iyalinsa bayan ta rasu sai ya ce: Allah ya gafarta wa wance, shekararmu ashirin tare amma ko sabani ba mu taba ba.

In ji wani dan Fulani lokacin da yaje kasa mai tsarki domin yin aikin hajji bayan jirginsu ya sauka a filin jirgin sama na sarki AbdulAziz dake Jidda (kasancewar akwai fitulu da dama akan doron titin filin jirgin).

SUNAYEN SAHABBAI GOMA DA AMBATONSU YA ZO A HADISI GUDA AKA YI MUSU BUSHARA DA ALJANNA TUN SUNA DUNIYA:

1. Abubakar Assiddik ( Allah ya yarda da shi).

2. Umar Alfaruq (Allah ya yarda da shi).

3. Usman Ibn Affan (Allah ya yarda da shi).

4. Aliyu Ibn Abi Dalib (Allah ya yarda da shi).

5. Abu Ubaida Ibnul Aljarrah (Allah ya yarda da shi).

6. Abdul Rahman Ibnu Auf (Allah ya yarda da shi).

7. Azzubair Ibnul Awwam (Allah ya yarda da shi).

8. Dalhatu Ibnu Ubaidillah (Allah ya yarda da shi).

9. Sa’ad Ibnu Abi Wakkas (Allah ya yarda da shi).

10. Sa’id Ibnu Zaid (Allah ya yarda da shi).

Mutum mai hankali yana ci ne don ya rayu, amma bayin ciki irin su Ash’abu suna rayuwa ne don su ci! 

Ash’ab wani mutum ne da labarawa suke ba da misali da shi wurin kwalama da babakeri, da hadama da mutunta abinci sama da komai.

Daga cikin labarinsa:

¨ Wata rana budurwarsa ta tambaye shi ya ba ta kyautar zobe don ta rika tunawa da shi, sai ya hana ta, ya ce mata idan kina son tunawa da ni, ki rika tunowa kin tambaye ni zobe na hana ki!

¨ Ya taba yi wa wasu yara karya ya ce ana rabo a gidan wane, da ya ga suna ta tafiya can, sai ya ce a ransa kar fa a ce da gaske ne, sai ya ruga don ya riga su.

¨ Yana sahun sallah da wani shugaba, sai shugaban ya yi tusa daraaam sai shi kuma Ash’ab ya kama hanji ya fita kamar ya yi habo, da shugaban nan ya koma gida sai ya bi shi ya ce ba ni ladana, ya ce wane lada? Ya ce ladan tusar da ka yi; ko ka biya ni, ko in je gari in yayata in ce wannan tusar da ma kai ka yi ba ni ba!

Tambaya: Menene mahimmancin mace ta haihuwa a asibiti, kuma shin haihuwar gida tana da wata illa?
Amsa: Na farko dai ba’a cewa an haihu lafiya sai an yi kwana arba’in da haihuwar.
Na biyu ita haihuwa ba yadda za’a yi a hankalaci cewa za’a samu matsala da ita.
Na uku: A asibiti ne ake da ma’aikata kwararru wadanda suke sanin matsalar haihuwa idan ta faru, ko za ta faru; don haka idan aka haihu ko aka fara nakuda a gida, matsala tana iya faruwa, inda ba wanda zai fahimce ta har sai ta yi tsamari, sannan in an je asibiti sakamakon ya zamo abin da ba’a bukata. Amma al’adarmu ta cewa idan mace ba ta haihuhu a gida ba, ana ganin kamar nakasa ce, ko gajiyawa, don haka za ta yi iya kokarinta ta ga ta haihu a gida, ba tare da ta yi la’akari da hadarin da take sa kanta da kuma jairirinta a ciki ba.
    Ba’a son nakuda ta fuce awa 12, kuma ya kamata a gane cewa, mai ciki za ta iya samun ciwo wanda ita a gunta nakuda ce, amma idan aka zo asibiti sai a ga nakudar ba ta tabbata ba, shi ya sa za ka ji wasu suna cewa sun yi kwana hudu ko biyar suna nakuda, kuma sun haihu lafiya. Idan nakuda ta wuce awa 12, jaririn, da uwar suna iya shiga wani mugun hali, irin wannan ne zai janyo ka ga an haifi da babu rai, ko kuma ya fara farfadiya tun yana yaro, ko ya zama wani sususu, sannan idan wadannan ba su samu yaro ba, zai iya tashi dakiki.
     Uwa kuwa mahaifarta za ta iya fashewa idan tsohowar haihuwa ce, idan kuma haihuwar fari ce za ta iya haduwa da yoyon fitsari, ko ma har da na bayan-gida, ko kuma bayan ta haihu ta ci gaba da zub da jini wanda zai iya kaiwa ta rasa ranta. Don haka idan mace ta yi nakuda a gida, cikin biyu ne; Tana iya haihuwa lafiya, to amma idan ta shiga matsala ba za’a gane matsalar da wuri ba, lokacin da za’a zo asibiti kuma ta galabaita, sannan kuma a karshe ko a rasa ta, ko a rasa dan dake cikinta, ko a rasa su gabadaya.

Dr. Idris Sulaiman Abubakar.
(Aminu Kano Teaching Hospital)

Tambaya:    Menene hukuncin korar YARO daga masallaci, ko daga sahun farko don BABBA ya maye gurbinsa? **   

                                                                                         Ba Suna

 Amsa:   Idan yaro ba ya cutar da kowa – da aikinsa ko maganarsa to bai halarta a fitar da shi daga masallaci, ko a dawo da shi sahun da yake baya da wanda yake tsaye a cikinsa ba, koda kuwa a bayan liman yake kai tsaye; saboda a sunna wanda ya fara zuwa wuri shi ya fi cancanta da shi, kuma Annabi (SAW) ya hana mutum ya tashi danuwansa daga wurinsa shi don ya zauna a wurin, masallatai kuma gidajen Allah ne, bayin Allah (baba da yaro) daya suke a cikinsu. Hadisin da Annabi (SAW) yake cewa “Masu hankalin cikinku ya zama su suke biye da ni a sahu” kuwa ba ya nuna a rika korar yara daga sahun farko koda daga su sai liman kamar yadda wasu malamai suka dauka. Wannan hadisi yana kwadaitar da manyan ne kan su je masallaci da wuri don su samu tsayawa a bayan liman. Sannan korar su daga sahun da suke zuwa na baya zai haifar da matsaloli kamar: Taruwarsu a wuri guda wanda wannan zai sa su yi ta wasa da hayaniya lokacin sallah Za su rika kin Masallaci Za su rika in masallata, musamman mai korar su.

Shiekh Ibn Uthaimin